Подигнување на нови лозови и овошни насади, набавка на добиток, механизација, системи за наводнување и поддршка на младите земјоделци се мерките кои и оваа година ќе се ко-финансираат преку Програмата за рурален развој.
Со неа покрај зголемувањето на конкурентноста на земјоделските стопанства се обезбедува и финансиска помош за изградба на нови локални патишта, водоводи и инфраструктурата во руралните подрачја.
Преку оваа програма ќе се субвенционираат и 50 проценти од банкарските камати за земјоделските кредити.
Со овие пари се обезбедува и финансиска поддршка за набавени јуници, овци, кози и свињи од октомври до декември лани, а истовремено се субвенционираат и подигнатите нови повеќегодишни лозови и овошни насади.
Дел од градоначалиците имаат забелешка во однос на спроведувањето на мерката за инвестирање во инфраструктурата во руралните средини и бараат поедноставување на постапката за аплицирање.
