По средбата со тутунопроизводителите во Прилеп, министерот за земјоделство Арјанит Хоџа ја даде следната изјава:
-Прво и основно, се наоѓаме на почеток на откупот и рано да се каже каков ќе биде годинешниот откуп на тутун. Ја знам маката на тутунарите, и сиот вложен труд и емоциите се силни, но мораме да бидеме реални и да зборуваме за тоа што може Владата да помогне во овој случај. Во цената не можеме да влијаеме, откупните претпријатија се приватни компании. Владата може да дава субвенции и тоа 30% од вкупниот буџет за директни субвенции за сите земјоделци и сточари, одат за тутунарите. Годинава сите производители се сложуваат дека тутунот е за нијанса послаб квалитет од ланскиот, но велат дека проценката е за две класи подолу од таа што е реална. Затоа денеска се договоривме до петок да седнеме на иста маса, МЗШВ како институција, откупувачите и тутунопроизводителите и да се соочат аргументите на двете страни. До тогаш, се договоривме дека протестите ќе бидат прекинати – изјави министерот Арјанит Хоџа, по средбата со Иницијативниот одбор на незадоволните тутунари од прилепскиот регион.
До средбата во петок во МЗШВ, протестите на незадоволните тутунари се ставаат во мирување, а со повлекувањето на поверениците од страна на Сојузот на тутунски здруженија, практично ќе биде прекинат откупот на тутун.
