Министерот за земјоделство, шумарство и водостопанство, Љупчо Николовски, вчера имаше работен состанок со Советот на професори.
-На вчерашниот состанок на Советот на професори, разговаравме за актуелната состојба во земјоделството, за мерките што ги презема МЗШВ и за планираните политики за следниот период. Воедно, ги информирав професорите за статусот на реализација на проектите на кои работиме со поддршка од Светска банка, Европската унија и ФАО, истакна Николовски.
Заедно со професорите ќе се започне со подготовка на долгорочна стратегија за развој на земјоделството, бидејќи предлозите и советите од науката се важни за креирање на ефикасни земјоделски политики.
-Со цел поефикасно спроведување на идните политики, на состанокот формиравме работни групи кои ќе работат во областа на фитофармација, советодавен систем, почви, цена на земјоделски производи, сточарство, градинарство, наводнување и агроеколошки мерки, рече Николовски.
Овие работни групи ќе бидат составени од професори од областа на земјоделството и од вработени во МЗШВ.
„Современо Земјоделство“
