Владината работна група составена од министерот за локална самоуправа Горан Милевски, претседателот на Заедницата на единици на локална самоуправа (ЗЕЛС) Петре Шилегов и претставници на ЗЕЛС, како и претставници од надлежните министерства, ги усогласија надлежностите кои што ќе се предадат од централната на локалната власт.
Министерството за земјоделство, шумарство и водостопанство (МЗШВ) е едно од најкомплексните министерства и е орган со многу широк дијапазон на делување и обврски во системот на државната администрација и во давањето на јавни услуги.
МЗШВ во својата организациона структура има 25 сектори и 127 одделенија, како и 45 подрачни единици и претставува министерство со најкомплексна структура. И покрај големата комплексност МЗШВ ги финализираше подготовките за предавање на надлежностите од централната на локалната власт и ќе биде првото министерство кое ќе имплементира децентрализација. МЗШВ веќе ги има подготвено нацрт законските измени за одредбите кои треба да се предадат и веднаш по измената на Законот за локална самоуправа, ќе ги предаде надлежностите.
МЗШВ на локалната самоуправа за почеток ќе и ги предаде ингеренциите за активности поврзани со земјоделско земјиште, регистрација на земјоделци како и водење на евиденција на планираното производство, спроведување на постапки за утврдување на штети од елементарни непогоди и други влијанија, штети од дивеч и внесување на податоци во пазарен информативен систем.
„Современо Земјоделство“
