Полициски час од полноќ, продолжено работно време на угостителските објекти и почнување со работа на вежбалните, фитнес центрите и теретаните, се дел од новите мерки што главниот Кризен штаб препорачува да важат од среда…
Сеуште е рано за да се даде општа препорака за маските да не се носат на отворено, изјави министерот за здравство Венко Филипче.
Во одговор на новинарско прашање, Филипче рече дека за ова е разговарано , но оти заклучокот е дека треба да се причека уште недела или две за една ваква мерка.
– Следниот чекор би бил, но сеуште е рано да кажеме кога би било тоа, да се носат маските како претходно, односно само во група надвор. Засега е рано. Тоа ќе биде следно за што ќе разговаравме. Инициравме дискусија и заклучокот е дека треба да почекаме уште недела или две, рече Филипче.
Засега е рано и да се организираат свадби и концерти.
– Сеуште не се дозволени концертите и свадбите бидејќи стравуваме дека во овие случаи може да се намали дистанцата меѓу луѓето кои се присутни и затоа одиме постепено. Ако продолжат трендовите, ќе бидат дозволени и концертите, нагласи Филипче.
Новите предлози за олабавување на рестриктивните мерки, како што изјави, се поради трендот на намалување на бројот на новозазарени и значителното празнење на болничките капацитети.
Извор Канал 5
