Африканската свинска чума сè уште се шири во соседна Србија. Заразната болест е дијагностицирана на фарма во населеното место Глободер, потврдено е од Одделот за републичка ветеринарна инспекција во Крушевац, пренесува РТС.
Министерството за земјоделство, шумарство и водостопанство – Ветеринарна управа, ги прогласи заразени подрачјата на населеното место Глободер на територијата на градот Крушевац и населените места Стопања и Бресно Поле на територијата на општина Трстеник.
Местата во радиус од 10 километри околу изворот на инфекцијата на територијата на градот Крушевац, општина Трстеник и општина Александровац се загрозени.
Во тек е попис на сите фарми на кои се чуваат и се одгледуваат свињи, а нивно преместување и транспорт е забрането во заразената и загрозена област.
Сите сопственици на свињи се должни да пријават промени во здравствената состојба на свињите до надлежната ветеринарна станица или ветеринарна инспекција.