Извршителите кои ја блокираа сметката на земјоделскиот комбинат Пелагонија поради долг од околу 37 милиони евра, чекаат сигнал од банките да ја деблокираат. Комбинатот на Орце Камчев и Цветан Панделески, кои се под истрага на СЈО, ќе работи под строг мониторинг на големите банки, за да може да остварува профит и да ги враќа кредитите. Целата блокада е сензитивна зашто треба да се води сметка и за илјадниците грла крави, овци и јагниња кои тешко ќе преживеат ако комбинатот отиде во стечај.
Извршителите еднаш ја одблокирале сметката за да се купи храна, но и да им се исплатат плати на вработените. Од комбинатот велат дека поддршка за нивната работа имаат и од Владата, зашто со години од државата добиваат субвенции. Комбинатот ќе почне да го враќа долгот кон банките од септември годинава, кога ќе заврши и новата реколта на житните култури. ЗК Пелагонија од џин во македонскиот агро-бизнис, сега за кредитите од банките под залог и хипотеки ги има ставено имотот и опремата, механизацијата, силосите, па дури и говедата. Од Стопанска банка Скопје има најголем кредит во висина од 10 милиони евра.
Од НЛБ кредитот е 8,3 милиони евра, Стопанска банка Битола 3,2 милиони евра, Комерцијална 1.5 милион евра. Кредит има и од Орка Холдинг во висина од 3.4 милиони евра. Освен на банките комбинатот им должи и на фирми, но и на физички лица.
24.мк