Fruit Logistica е водечки саем за секторот на свежи производи, овошје и зеленчук, кој нуди бројни деловни можности, вмрежување и контакти на клучните носители на одлуки во секој сектор од индустријата. Ќе се одржи во Берлин, Германија, од 8 до 10 февруари 2023 година.
Голем број на македонски фирми имаат огромен интерес да бидат дел од овој престижен саем. А најверојатно и МЗШВ и оваа година ќе предводи македонски штанд за промоција на македонските производи.
Претходниот саем беше домаќин на бројни учесници и повеќе од 600 компании изложувачи, како и повеќе од 40 илјади посетители. Според организаторите, претстојното издание ќе го посетат уште повеќе професионалци и ентузијасти. На располагање се 112.000 квадратни метри, а ќе бидат присутни 1.994 изложувачи од 87 земји, најавуваат организаторите.
Главните теми на изданието за 2023 година вклучуваат логистика, машини и технологија, како и „Smart Agri“ (паметно земјоделство). Исто така, постои сектор на органски производи кој постојано расте и секоја година бележи се поголем број учесници.
Саемот ќе вклучи седум платформи за презентација на производи: свежо овошје и зеленчук, јаткасти плодови, сушено овошје, цвеќиња, билки, замрзнато овошје и зеленчук и органски производи. На посетителите ќе им понуди широк спектар на производи и настани како што се „Innovation Award FLIA“, „Start-up Day“, „Tech Stage“, „Logistics Hub“, „Future Lab“ и „Fresh Produce Forum“.
Исто така, поставена е платформа „Fruit Logistica Online“ која поддржува вмрежување и директна размена меѓу компаниите, носителите на одлуки и клиентите. Ќе обезбеди информации за нови производи и иновативни решенија во индустријата за свежо овошје и ќе обезбеди многу придобивки. За да учествувате, потребно е да се регистрирате.
Цената на дневниот билет е 45 евра, за сите три дена 85 евра, а може да се купи онлајн.
Саемот е отворен за посетители во среда и четврток од 9 до 18 часот и во петок од 9 до 16 часот.
