Во општинската сала на Могила, во битолско, вчера се одржа трибина во организација на Канцеларијата на Претседателот на Владата и МЗШВ, во рамки на кампањата за Договорно производство на сончоглед.
На оваа трибина се оствари средба на работната група предводена од Ленче Николовска, посебна советничка за земјоделство, шумарство и водостопанство на Претседателот на Владата на Република Македонија со земјоделци од пелагонискиот крај.

На средбата се разговараше за начинот, условите и можностите кои ги нуди откупувачот и сите чинители во овој процес.
Седебатираа сите потребни информации, сугестии и размислувања меѓу земјоделците и работната група која ќе го следи целиот процес, од склучување на договорите до откуп.

-Во Могила ја одржавме првата трибина за Договорното производство на сончоглед. Големиот интерес на земјоделците покажува дека сме на вистинскиот пат, а нивните сугестии беа во насока да успее овој начин на соработка со откупувачот, истакна Николовска.
Прашањата кои ги поставуваа земјоделците се однесуваа на потребата од дополнителна земја за обработка, квалитетно и поевтино семе како и повисоки субвенции за сончоглед.

-Површини кои досега беа под пченица или беа необработени предлагаме да ги насеете со сончоглед. Ќе добиете регрес семе, а ќе имате гарантиран откуп. Цената ќе биде пазарна но со зголемени приноси и субвенции и ќе ви се исплати производството, рече Николовска.
Директорот на АД “Благој Ѓорев” – Велес, Горанчо Лазов, ги охрабри присутните, и вети дека редовно секогаш се плаќало однеговата компанија,така и ќе продолжи.
-АД „Благој Ѓорев“ – Велес има капацитет за преработка на 40 000 тони сончоглед, а од домашно производство обезбедува само 2000 тони. Ниви имаме, земјоделци имаме, пласман има, останува само да се организираме, истакна Лазов.
На трибината беа присутни претставници од МЗШВ и сите институции од областа на земјоделството, домашни и бугарски експерти како и претставник од реосигурителната компанија Европа Ре.
Николовска потенцираше дека едукацијата на земјоделците е круцијална.
-Едукација и само едукација! Дали преку медиуми, на терен, од село во село, од фарма до фарма…треба да надокнадиме изгубени 10 години и во овој дел. И да се тргне партиското влијание во руралните средини кое е штетно за земјоделците. За тоа ќе мора и сами да се изборат. Ваквото штетно влијание на поединци може само да ги кочи во овие процеси на едукација и модернизирање на земјоделското производство кои ги води Владата, истакна Николовска.
Ленче Николовска како посебен советник за земјоделство, шумарство и водостопанство на Претседателот на Владата на Република Македонија, работи активно и посветено за подигнување на најзначајната гранка за општетсвото – земјоделството. Таа порача дека земјоделците мораат да се сплотат, да не се политизираат и манипулираат, и резултатите за многу скоро ќе бидат видливи. Нејзината работа единствено е насочена кон современо земјоделство, нови и модерни технологии, обезбедуање сигурен откуп и фиксни цени за сите производители.
Работната група во рамки на кампањата за Договорно производство на сончоглед, во организација на МЗШВ и Канцеларијата на Претседателот на Владата и посебната советничка за земјоделство, Ленче Николовска, ја сочинуваат:
1. Ленче Николовска, посебен советник за земјоделство, шумарство и водостопанство на Претседателот на Владата на Република Македонија;
2. Никола Бабовски , директор во Агенција за финансиска поддршка во земјоделството и руралниот развој;
3. Благој Индов, директор на Државен инспекторат за земјоделство;
4. Авдуљ Селам-Селами, заменик директор во Агенција за финансиска поддршка во земјоделството и руралниот развој;
5. Јулијана, претставник на МЗШВ;
6. Горанчо Лазов, директор на АД “Благој Ѓорев” – Велес;
7. Митат Исмаиловски, земјоделски производител – Будаково;
8. Никола Ѓероски, земјоделски производител;
9. Александар Стојанов, земјоделски производител;
10. Проф.Златко Арсов, Факултет за земјоделски науки и храна;
11. Ангела Геровска Ѓуровска, советник за органско поризводство и воведување на нови технологии при ѓубрење.
Следната работилница ќе биде на 13.12.2018 на која ќе присуствува и министерот за земјоделство, Љупчо Николовски.
Во кој регион ќе биде втората средба дополнително ќе информираме. Планот е до почеток на март месец, пред сеидба да се одржат повеќе трибини за да се информираат земјоделците од сите региони каде што успева сончогледот.
М-р Билјана Петровиќ за Современо Земјоделство

