Организација и спроведување на кампања за осеменување во овчарството е една од најприоритетните задачи во месец август. Овците се сезонски, полициклични животни кај кои мркањето е на секои 16 -17 дена во сезоната на парење. Еструсот е од 24 до 36 часа, но во зависност од расата, начинот на одгледувањето и исхраната на животните, може да се движи од 6 до 72 часа.
Овулацијата настанува кон крајот на еструсот, обично 24 – 40 часа од неговиот почеток. Од голема важност за добивање на висока продуктивност кај овците е правиот избор и подготовка на машките приплодни грла. За размножување се избираат овни со добар екстериер, здрави копита, нормално развиени семеници и висок квалитет на семената течност. Потребно е да се земат крвни примероци и да се исптаат за заразен епидимитис. Многу е битна исхраната на овните и на тоа фармерите обрнуваат посебно внимание два месеци пред почетокот на кампањата за осеменување. Хранливата смеска за еден овен со жива тежина од 100 кг. може да биде следна: овес 0,5кг, јачмен 0,2кг, печени трици 0,3кг, сончоглед или пулпа 0,2 кг и моркови 0,5 кг, зелена трева и сено по желба и 0,5 – 1л млеко со едно јајце во него.
„Современо Земјоделство“
