Во Делчево започнува спроведувањето акции за чистење на одводните канали во руралните средини. Првата акција како што информираа од општината се реализираше во делчевското село Вирче.
На иницијатива на МЗ од село Вирче, а во соработка со Јавното комунално претпријатие „Брегалница” и Општина Делчево, денеска се спроведе акција за чистење на одводниот канал кој поминува низ селото Вирче. Интервенцијата за чистење на каналот во село Вирче е во насока на превенирање на евентуално излевање на водата од коритото и спречување поплави, истакнаа од Општината.
Активноста како што додадоа е во согласност на Годишната програма за работа за 2021 на Јавното комунално претпријатие „Брегалница”.
-Во рамките на оваа програма е предвидено соодветно чистење речни корита и канали во населените места. Претходно, ваква активност беше спроведена и во населбата Ѕвегорска Река, додадоа од Општината.
Во наредниот период како што додадоа акцијата за чистење на одводните канали ќе продолжи како во останатите селски средини, така и во градот.
