Успешно заврши поднесувањето на барања за субвенции за Програмата за директни плаќања 2020 година. До петок, (31- ви јули 2020), до кога беше и последниот ден за пријавување на земјоделците, барање за добивање на финансиска поддршка во земјоделството поднеле 65.554 земјоделци.
Подрачните единици на Министерството за земјоделство, шумарство и водостопанство, во соработка со Агенцијата за финансиска поддршка во земјоделството и руралниот развој, и оваа година успешно го реализираа процесот за поднесување на барањата. Во следниот период следува обработка на пристигнатите барања за субвенции и исплата на субвенции според предвидените рокови во Програмата за директни плаќања за 2020 година.
Аплицирањето за субвенциите се одвиваше електронски. И здружението за земјоделци „Современо Земјоделство“ од Битола, пријавуваше субвенции за своите членови.
Во Општина Битола, заедно со Општина Могила и Општина Новаци, поднесени се рекордни 4900 апликации и тоа 150 барања повеќе од минатата година.
Во овој период се поднесуваа барања за субвенции за растително производство и тоа за поледелски и градинарски култури, лозови и овошни насади, за сточарско производство, односно оние земјоделци кои одгледуваат говеда, овци, кози, пчели свињи, за финансиска поддршка за заклани животни во кланица.